當我再一次拖著疲累嘅身軀躺喺床上
並唔係因為一日勤奮工作所帶嚟嘅倦怠感
情緒早已經悄悄吞噬咗我對創造嘅熱情
伴隨著胸口疼痛嘅告誡
躺喺床上 只係生理給予嘅警示
令我嘅身體能夠短暫逃離被時間吞沒嘅痛苦假象
而每當我合埋雙眼 只會更不自覺咁希望佢地唔再感知光線
為免刺激燥動嘅心臟 我喺雙眼前綁上一條白長嘅薄紗
直到我再次因為世界感到好奇為止
然而眼睛嘅不作為 只換嚟耳朵哩個夜郎漸漸膨脹自大
顯然 目空一切依舊無阻思緒接收人世間嘅不幸事
伴隨著一陣陣忽近又遠嘅狂笑嚎哭聲愈演愈大
好奇心再次引領我嘅手不由自主咁解下眼前嘅紗布
曾經有聲無影嘅想像 一層一愈見清晰
原本色彩斑斕嘅世界早已變得非黑即白
以大吃小嘅畫面不斷重演 屢見不鮮
大嘅先將一群群小嘅驅散 繼而分隔開
再續一將其擊倒 展現出壓倒性嘅力量
理想主義烏托邦 喺弱肉強食嘅世界裏面從來都不值一談
只不過 我哋活喺一個浩瀚嘅三維世界裏面
物與物之間 永遠存在空隙
弱小嘅往往只能先依靠狹小的空間成長
並奢望喺被強權壓扁之前壯大起來
再以年月為單位 等待運氣湊合天地時利推波助瀾
然後換取渺小嘅機會 反撲一番
畢竟現狀嘅惡 都唔係喺一時半刻間形成
而當像徵解放自由嘅白紗布一圈圈被解開嘅同時
亦代表對暴力嘅無限崇拜同肯定
猶如喺大爆炸之前嘅宇宙
亦只不過是一個體積無限小嘅時空奇異點
但爆發嘅威力仍然可以經過不斷嘅膨脹到達今天
由此可見 我嘅本質就係宇宙 但宇宙唔係我
而每當我仰望星空 懷念宇宙之初嘅純粹同善良之際
或者宇宙亦同時以 嫉妒 嘲弄嘅眼神回望
默默咁睇著我為咗佢創造嘅一切
喺空隙間卑躬屈膝 爭扎求存
Comments