首先，容我疏理一下脈絡，作為香港人，經歷過二O一九年，我哋或者好容易將疫情同政治操作連結，利用人對死亡嘅惶恐，一步一步剝削人民嘅自由，利用人崇拜權威嘅盲點，以人民監督人民，以健康為由重新建構社會信用系統。好快，喺嚟緊嘅二十四號，我都會被社會性謀殺，原因就係無打疫苗。我唔會否定疫情啱啱開始嘅時候，病毒係殺人唔貶眼，但係科學上，經時間推移，病毒嘅變種係會提高傳染力，減低殺傷力，殺死宿主對病毒本身都毫無益處，更不論疫苗嘅成效同安全性問題，因為可能從來都唔係科學問題。科學精神由始至於都係在於懷疑，而當今喺疫情上面嘅展示出嚟嘅，已經成為宗教式嘅愚弄人心嘅把戲，以上嘅觀點，係稍為有思考能力嘅人都會諗倒，咁以下容我就推敲，疫症，對於權貴同在上位者到底有咩有好處。
喺我心目中，各種政治體制都係骯髒腐敗，只係手段唔同，有啲係用槍指住你，有啲係用物質去威迫利誘你，社會哩個系統就係將活生生嘅人變成機械嘅一部分，而人類文明愈發展，愈到近代，哩個問題愈嚴重，齒輪係無法成為晶片嘅，而所謂嘅社會流動性係愈嚟愈低，唔通今日重有人講美國夢？或者戰後嘅年代可以講有過一番光景，但係現代政治架構裏面，代表基層嘅代議士所剩有幾多，你睇英國，精英主義除咗顯露出貧富之間對社會認知嘅差距外，更加令到個世界分裂成平行時空，當社會上嘅大多數齒輪叫苦連天嘅時候，晶片掌權嘅政府推出嘅政策係保障佢地電路板上的通電暢通無阻，而可悲嘅齒輪已經滿身鐵鏽。但係有一樣野，慢慢打破咗哩個局面，係網絡。
網絡發展初期，大家都局限於係文字上嘅通訊，而且門檻高。而到咗今日今日，資訊科技嘅普及程度已經唔洗我多講，喺WEB3.0嘅年代，人已經慢慢打破咗物理空間嘅局限，喺網上可以連結世界各地唔同志同道合嘅人交流，唔單單係圍爐取暖，如果我有一個好嘅想法，好嘅願景，我可以喺網絡上面眾籌，即使你喺世界嘅另一邊，你都可以課金支持，而喺傳遞資訊方面，每個人都可以發表意見，自己成為媒體，而且成本極低。喺二十一世紀裏面大大小小嘅政治事件裏面，由美國總統大選到香港嘅示威，資訊科技都扮演一個極其重要嘅角色。
但係最令權貴坐立不安嘅，係我地步向緊WEB 4.0，一個去中心化嘅架構，即使通訊幾方面，權貴們都係掌握住我哋生存嘅命脈，金錢。錢說到底係一個人類創造出嚟嘅概念，用數字去量化唔同嘅價值，以便利人與人之間嘅合作，只要夠多人相信，任何野都可以擁有價值。區塊鏈技術愈成熟，作為執行社會契約嘅人所掌握嘅權力就愈少，而佢哋嘅角色就愈嚟愈邊緣化。但當佢哋控制唔倒物質系統，而貿然用支槍指住你個頭又名不正，言不順，如果「鎚仔幫」要利用一個睇唔見嘅威脅去鞏固自己嘅管治，所謂嘅西方民主國家們同時間亦需要一個黑天鵝去解佢地燃眉之急。先唔講美國嘅醫藥界同政治界千絲萬縷嘅關係，推疫苗有無回佣等等嘅問題，但係所謂嘅防疫政策到底有益於誰，有害於誰，大家有眼見。邊個無咗份工，邊間公司升值，自己去睇，唔好將哩年代最好嘅禮物變成毒藥咁服用，網絡唔係比你娛樂至死嘅。
點解我用權貴概括哂咁多單位，因為佢地實際上已經走埋一齊，去保障自己嘅利益，大財團，管治階級，執法者等等，CY唔CYBERPUNK先？哩兩年間，佢地利用社交媒體去拎番個發表資訊嘅話語權，咩係FACT？邊個說了算？幾多中小企，初創哩兩年間死得不明不白？幾多個人數據以健康之名被收集？重點係拎走埋你份工，令你不得不更依賴佢哋。限制聚集，減低你哋嘅交流，用口罩削弱你哋嘅社交能力，打碎人與人之間嘅信任。最大型嘅人體x社會實驗更加唔洗講，就係EMAIL，有幾多人順從盲從，有幾多人不得不屈服於生活，篩選過後，剩低幾多人企喺佢哋對立面。坦白講，哩一場屬於平民同權貴集團之間嘅CIVIL WAR結果好明顯，無可奈何地，我哋再一次將權力拱手相讓番比在上位者，亦至少為佢地續命二十年。
而香港係可悲嘅，可悲在我哋既係精英主義同時被極權制度指指點點嘅複合體，係1984年嘅美麗新世界。而更可悲嘅係，哩個令權貴聞風喪膽嘅去中心化技術，如NFT，加密貨幣，對於大多數人嚟講只係一種投機，炒賣，只係一個令自己搵舊錢繼而能夠獨善其身嘅跳台，而唔係打破舊社會體制，改變哩種小數人掌握多數人命運嘅工具。
Commentaires